విశ్వామిత్రతపఃఫలాం ప్రియతరాం విప్రాలిసంసేవితాం
నిత్యానిత్యవివేకదాం స్మితముఖీం ఖండేందుభూషోజ్జ్వలామ్ ।
తాంబూలారుణభాసమానవదనాం మార్తాండమధ్యస్థితాం
గాయత్రీం హరివల్లభాం త్రిణయనాం ధ్యాయామి పంచాననామ్ ॥ 1 ॥
జాతీపంకజకేతకీకువలయైః సంపూజితాంఘ్రిద్వయాం
తత్త్వార్థాత్మికవర్ణపంక్తిసహితాం తత్త్వార్థబుద్ధిప్రదామ్ ।
ప్రాణాయామపరాయణైర్బుధజనైః సంసేవ్యమానాం శివాం
గాయత్రీం హరివల్లభాం త్రిణయనాం ధ్యాయామి పంచాననామ్ ॥ 2 ॥
మంజీరధ్వనిభిః సమస్తజగతాం మంజుత్వసంవర్ధనీం
విప్రప్రేంఖితవారివారితమహారక్షోగణాం మృణ్మయీమ్ ।
జప్తుః పాపహరాం జపాసుమనిభాం హంసేన సంశోభితాం
గాయత్రీం హరివల్లభాం త్రిణయనాం ధ్యాయామి పంచాననామ్ ॥ 3 ॥
కాంచీచేలవిభూషితాం శివమయీం మాలార్ధమాలాదికా-
-న్బిభ్రాణాం పరమేశ్వరీం శరణదాం మోహాంధబుద్ధిచ్ఛిదామ్ ।
భూరాదిత్రిపురాం త్రిలోకజననీమధ్యాత్మశాఖానుతాం
గాయత్రీం హరివల్లభాం త్రిణయనాం ధ్యాయామి పంచాననామ్ ॥ 4 ॥
ధ్యాతుర్గర్భకృశానుతాపహరణాం సామాత్మికాం సామగాం
సాయంకాలసుసేవితాం స్వరమయీం దూర్వాదలశ్యామలామ్ ।
మాతుర్దాస్యవిలోచనైకమతిమత్ఖేటీంద్రసంరాజితాం
గాయత్రీం హరివల్లభాం త్రిణయనాం ధ్యాయామి పంచాననామ్ ॥ 5 ॥
సంధ్యారాగవిచిత్రవస్త్రవిలసద్విప్రోత్తమైః సేవితాం
తారాహారసుమాలికాం సువిలసద్రత్నేందుకుంభాంతరామ్ ।
రాకాచంద్రముఖీం రమాపతినుతాం శంఖాదిభాస్వత్కరాం
గాయత్రీం హరివల్లభాం త్రిణయనాం ధ్యాయామి పంచాననామ్ ॥ 6 ॥
వేణీభూషితమాలకధ్వనికరైర్భృంగైః సదా శోభితాం
తత్త్వజ్ఞానరసాయనజ్ఞరసనాసౌధభ్రమద్భ్రామరీమ్ ।
నాసాలంకృతమౌక్తికేందుకిరణైః సాయంతమశ్ఛేదినీం
గాయత్రీం హరివల్లభాం త్రిణయనాం ధ్యాయామి పంచాననామ్ ॥ 7 ॥
పాదాబ్జాంతరరేణుకుంకుమలసత్ఫాలద్యురామావృతాం
రంభానాట్యవిలోకనైకరసికాం వేదాంతబుద్ధిప్రదామ్ ।
వీణావేణుమృదంగకాహలరవాన్ దేవైః కృతాంఛృణ్వతీం
గాయత్రీం హరివల్లభాం త్రిణయనాం ధ్యాయామి పంచాననామ్ ॥ 8 ॥
హత్యాపానసువర్ణతస్కరమహాగుర్వంగనాసంగమా-
-ందోషాంఛైలసమాన్ పురందరసమాః సంచ్ఛిద్య సూర్యోపమాః ।
గాయత్రీం శ్రుతిమాతురేకమనసా సంధ్యాసు యే భూసురా
జప్త్వా యాంతి పరాం గతిం మనుమిమం దేవ్యాః పరం వైదికాః ॥ 9 ॥
ఇతి శ్రీమచ్ఛంకరాచార్య విరచితం శ్రీ గాయత్ర్యష్టకమ్ ।
viśvāmitratapaḥphalāṃ priyatarāṃ viprālisaṃsēvitāṃ
nityānityavivēkadāṃ smitamukhīṃ khaṇḍēndubhūṣōjjvalām ।
tāmbūlāruṇabhāsamānavadanāṃ mārtāṇḍamadhyasthitāṃ
gāyatrīṃ harivallabhāṃ triṇayanāṃ dhyāyāmi pañchānanām ॥ 1 ॥
jātīpaṅkajakētakīkuvalayaiḥ sampūjitāṅghridvayāṃ
tattvārthātmikavarṇapaṅktisahitāṃ tattvārthabuddhipradām ।
prāṇāyāmaparāyaṇairbudhajanaiḥ saṃsēvyamānāṃ śivāṃ
gāyatrīṃ harivallabhāṃ triṇayanāṃ dhyāyāmi pañchānanām ॥ 2 ॥
mañjīradhvanibhiḥ samastajagatāṃ mañjutvasaṃvardhanīṃ
vipraprēṅkhitavārivāritamahārakṣōgaṇāṃ mṛṇmayīm ।
japtuḥ pāpaharāṃ japāsumanibhāṃ haṃsēna saṃśōbhitāṃ
gāyatrīṃ harivallabhāṃ triṇayanāṃ dhyāyāmi pañchānanām ॥ 3 ॥
kāñchīchēlavibhūṣitāṃ śivamayīṃ mālārdhamālādikā-
-nbibhrāṇāṃ paramēśvarīṃ śaraṇadāṃ mōhāndhabuddhichChidām ।
bhūrāditripurāṃ trilōkajananīmadhyātmaśākhānutāṃ
gāyatrīṃ harivallabhāṃ triṇayanāṃ dhyāyāmi pañchānanām ॥ 4 ॥
dhyāturgarbhakṛśānutāpaharaṇāṃ sāmātmikāṃ sāmagāṃ
sāyaṅkālasusēvitāṃ svaramayīṃ dūrvādalaśyāmalām ।
māturdāsyavilōchanaikamatimatkhēṭīndrasaṃrājitāṃ
gāyatrīṃ harivallabhāṃ triṇayanāṃ dhyāyāmi pañchānanām ॥ 5 ॥
sandhyārāgavichitravastravilasadviprōttamaiḥ sēvitāṃ
tārāhārasumālikāṃ suvilasadratnēndukumbhāntarām ।
rākāchandramukhīṃ ramāpatinutāṃ śaṅkhādibhāsvatkarāṃ
gāyatrīṃ harivallabhāṃ triṇayanāṃ dhyāyāmi pañchānanām ॥ 6 ॥
vēṇībhūṣitamālakadhvanikarairbhṛṅgaiḥ sadā śōbhitāṃ
tattvajñānarasāyanajñarasanāsaudhabhramadbhrāmarīm ।
nāsālaṅkṛtamauktikēndukiraṇaiḥ sāyantamaśChēdinīṃ
gāyatrīṃ harivallabhāṃ triṇayanāṃ dhyāyāmi pañchānanām ॥ 7 ॥
pādābjāntararēṇukuṅkumalasatphāladyurāmāvṛtāṃ
rambhānāṭyavilōkanaikarasikāṃ vēdāntabuddhipradām ।
vīṇāvēṇumṛdaṅgakāhalaravān dēvaiḥ kṛtāñChṛṇvatīṃ
gāyatrīṃ harivallabhāṃ triṇayanāṃ dhyāyāmi pañchānanām ॥ 8 ॥
hatyāpānasuvarṇataskaramahāgurvaṅganāsaṅgamā-
-ndōṣāñChailasamān purandarasamāḥ sañchChidya sūryōpamāḥ ।
gāyatrīṃ śrutimāturēkamanasā sandhyāsu yē bhūsurā
japtvā yānti parāṃ gatiṃ manumimaṃ dēvyāḥ paraṃ vaidikāḥ ॥ 9 ॥
iti śrīmachChaṅkarāchārya virachitaṃ śrī gāyatryaṣṭakam ।